ايا صحة شريبتكم.
اليوم فالفايسبوك جاني تعليق كايبو ميشو وككل.ولو كوني مانيش من هواة التنسنيس والتبتبيت وخليت الحكايات هذي للمرضى النفسيين اللي تبارك الله منتشرين كالبطاطا او بالأحرى كبياعة الملسوقة العربي.

ماعينيش نطول فالميضوع خاطر الحال رمضان وقريب نڨلب ومازال عندي برشة ناس ماشفتهاش وبرشة حوايج ماعملتهاش خاصة.
لكن المفيد والاهم...كوني نحس ببرشة سعادة وفخر كي عباد مرضى كيفن هكا مركبلهم البوصفير فالكبدة ومطير على والديهم النوم.هاو نخليكم مع امثلة حية متاع كيفاش الفيروس الاخواني كي تزيد تركبلو خمسين كوش متاع كبت و 30 سنة عقد نفسية اشيعطيوا.
ولو كوني مانيش من هواة قص ولصق الحوارات الفايسبوكية والتدوينية والافتراضية عموما والطرق البوليسية الناتنة وكلام القحاب في ظهورات العباد لكن الحالة هذي تستوجب التوقف والاستثناء.

بلغني للتو من لدن الصديق والمدون دوفيتش كونو حثالة مالحثالات اللي طالعين كيف الفقاع هالايامات قاعد يصوت فالتي ان بلوغز باسمي انا.
لذا مجرد توضيح للاخوة المدونين اللي صوتلهم هالبوجادي هذا...صاحب هاته المدونة لايصوت(او بالاحرى لم يعد يصوت منذ شهر جانفي ) لاستفشاء ضاهرة التصويت بالاسماء المستعارة خاصة من طرف اللي ينددوا النهار وطولو بانتحال الشخصيات(والفاهم يفهم والمجراب تهمزوا مرافقو).

لذا ماتتخيلوش انو الزبراط يصوتلكم..الزبراط لايصوت الا بالمفهوم المصري للكلمة(التسويط) وفي إطار خاص وخاص جدا وحميمي في غالب الاحيان.

اما بالنسبة لبعض التقيحات النفسية كيما المصوّت هذا والمتمعشين من القص واللصق والشخصنة والمكٌين هذا...فما عندي مانقوللهم كان *** *** ***


بروا شاهية طيبة

رمضانـــكم مبروك وكل عام وآنتم بخير

مع تحية خاصة لأعضاء ومؤسسي هذا الڨروپ الفايسبوكي الدلول
سؤال بسيط لقراء هذه المدونة اللي ''يحكيوا لوجيك '' أمور دين...ياخي أول كلمة هبطت فالوحي موش إقرأ...اشقولكم كان نعملو '''ميز آجور '' ونردوها :''إقرأ...sinon برّاو لمحو الأمية'' هيهيييييو

كيما كل مرواحة نحاول نپروفيتي ديما بش نقرا شوية كتب بالعربي..الحاجة اللي نستفقدها فالطليان والسبب الكبير والاكبر فالكم الهائل متاع الاخطاء اللغوية والملائية والرسمية فاللي نخنتب فيه.هذوما عاد شوية كتب ماللي نقرا فيهم

الحبس كذاب والحي يروح لفتحي بالحاج يحيى
صراحة كتاب ممتاز وغير عادي ونادرا ماقريت منتوج 100% تونسي في هالمستوى هذا.ياسيدي لواش كملتو في ستة سوايع في جرة بعضهم.ولو عندي برشة تحفظ عالتوجهات الايديولوجية متاع پرسپكتيف والعامل التونسي (واليسار عموما والتونسي منه خصوصا) ولو كونهم اصدقاء شخصيين للعائلة ونعرفهم الكل واحد واحد وكنت فيما نلاحظ كونهم يعطيوا صبغة شبه ملحمية وميطولوجية للي قاساوه.بالطبيعة دون الاستنقاص ماللي عاناوه في اقبية الحكومة.فترة كالحة مالتاريخ التونسي لولا مجهود عبد الجليل التميمي في سمنارات الذاكرة الوطنية لاماطة اللثام عنها لكان مصيرها الفناء والنسيان.على كل كتاب دلول ننصحكم تقراوه اليوم قبل غدوة

الهاشمي الطرودي :ماساة بغداد
الهاشمي الطرودي مايستحقش التعريف لكن قرائتو للوضع العربي ماهيش مالوفة.كتاب صعيب شوية صراحة ولازم القارئ متاعو يكون عندو شوية باڨاج (بالمعنى المجازي موش الصحيح بالنسبة للقارئات) هيهيييو

رجاء بن سلامة:بنيان الفحولة
تحليل جيد لثنائية المذكر والمؤنث فالانطولوجيا الدينية للانسان العربي وتداعياتها فالقرن العشرين
كتاب يعمل الكيف صراحة

رشيد بوجدرة :الحلزون المربط
محمد شكري/بوجدرة/مولود فرعون والطاهر بن جلون/محمد الديب من اعظم الكتاب المغاربيين باللغة الفرنسية واسسوا حتى مدرسة ادبية تدرّس فالسوربون اسمها :''ادب المغرب العربي ''.عندهم (بخلاف بن جلون) قدرة كبيرة على استنباط السخرية والهزل من الواقع الاجتماعي والسياسي البائس اللي تعيش فيه الدزاير والمغرب.الكتاب هذا بالذات ماقريتوش قبل وبالصدفة لقيتو تحت راس الشايب.ميجود في مكتبة الكتاب ب7 دنانيس

الفة يوسف:حيرة مسلمة
في كلمة:التزغريد اكثر مالكسكسي او زيطة وشهود والذبيحة ڨنفوذ
كتاب باهي لكن مايستحقش البورديل الاعلامي اللي تعمل حولو

التصاور هذم خذيتهم بين بار بوشوشة وين تنجم تاكل تريلية ''كول الكل'' بلاش فلوس ومول وكلوفيس باخ تف(ولو موش في وقتهم)...وفي مطعم شعبي في بنزرت وين تنجم تهزلو الحوت متاعك وهو يشويهولك بدنينيس اما خير بياسر من بار الحبو(البش في تسمية اخرى) بلاش مشاكل وتعربيد.بحر اخر اكتشفتو اليوم في بنزرت اسمو ''الڨروت '' و''عين الداموس '' يعني اذا نعتبرو قليبية 10 على 10 انجمو نعطيوهم 9 فاسيل.
ملاحظة اخرى اليوم:فما حاجة بهتتني في بنزرت اللي صراحة قليل وين شفت مدينة في نظافتها في تونس.
شي يعمل الكيف.
الحاصيلو بخلاف الشراب والحوت والنوم والناموس والسخانة والشهيلي وسبان الرهوط المقلبة فالكياس...وخاصة الرهوط اللي تركب معاك وتبدا تنبر عليك كيفاش تسوق الواحد ماهو يصنع في شي.
برا انشا الله في حجة وكل عام وتونس بخير

مطعم شعبي لاصق مرشي الحوت متاع بنزرت
لاحظوا البورديل اللي خلاوه 4 عظرته

مطعم بوشوشة
اعلى الصورة على اليمين تظهر جريدة الحدث سيئة الذكر

بحر ''لي ڨروت '' بنزرت

بحر '' عين الداموس '' بنزرت

حل صاحب هاته الخربة منتصف الاسبوع الفارط في ربوع جربوعستان المجيدة...حفظها الله وحشى في عين حسادها خيرة مادريات سوق الملاسين.
بما انو الوقت( لمايقتضيه الواجب من معاقرة الكحول بصفة غير منقطعة لمجابهة سخانة ربي بدرجة اولى وسخانة عبادو بدرجة اقل ) لايسمح باطالة الحديث حول العديد من الظواهر اللي مع كل مرواحة نحس انها تزيد تترسخ فالشخصية الجربوعية.شوية ملاحظات عالطاير.



شاهدت اليوم مباريات الجولة الثانية متاع البطولة.فما حاجة بسيطة ماذبية كان الاخوة فالجامعة يحطوها ملء اعينهم(وبلايص اخرى) كونو يستحيل اطلاقا الرقي بالكرة التونسية في ظل استفحال مرض عضال فالتحكيم التونسي.اليوم في 3 مقابلات(باجة والسي اس اس،الفراشيش والهمهاما،وخاصة البقلاوة والمكشخة)كان مردود الحكام اقل من الضعيف بكثير...مما تسبب في تشنيج اعصاب ''الـ13 الف مشترك '' ر جعوا الى ديارهم حاملين الكذا وشي فوق ريوسهم كنيشان للفريق الكبير...مايمنعش اللي الترجي مايستحقش الخسارة اليوم(وثبوت على الاقل 2 ضربات جزاء لاغبار عليها) وكانت ردة فعل الجمهور في مستوى المظلمة.


انتقلت كذلك لصفاقس اثناء الايام الفارطة نظرا لبعض الالتزامات العائلية.كنت حكيت هنا قبل عالفريق اللي شارك في اولمبياد تولوز متاع الرياضيات وتحصل عالمرتبة الاولى.يوم الجمعة جمعتني الصدفة بزوز مالفريق هذا..ماراعني الا وكونو كل الفريق (اكثر من 18 نفر) تحولوا لفرنسا على نفقتهم الخاصة اي اكثر من 1400 دينار مع تحملهم مصاريف التربص اللي اجراوه قبل التحول لفرنسا(150 دينار)دون اي سند مالي من قبل السلط...نفس السلط اللي ماتلكاتش فالتبندير والتطبيل للانجاز العظيم هذا..شي يوسف.

اثناء تواجدي في صفاقس(اللي يوما بعد يوم تولي اقرب لكابول او قندهار او اي مدينة افغانية منها الى مدينة في تونس دايور ماذبية واحد مالمعلقين يقلي شسمهم اصيلي كابول..الكببلة؟؟؟) سمعت بعرس غريب شوية لكون العريس هاك اللي كيما يڨولوا فيها بالظبط من عشاق الوهاب..للاسف موش الوهاب كيما عبد الوهاب المغني لكن الوهاب متاع السعودية باجراء حفل زفافه في ظروف اقل مايقال عنها انها خيالية بالنسبة لعبد بسيط مازال ماستوعبش الحكايات هذي كيف حالي:ايا سيدي السيد عمل عرس للرجال وعرس للنساء وخذا التراتيب الزجرية والردعية الكل بش حتى واحد من هاذم يمشي لذوكم والعكس بالعكس..حتى هنا انجموا نقولو حاجة عادية في مدينة يكاد يكون فيها عدد النساء الموش متحجبة لايفوت عدد اصابع اليد الواحدة..لكن قمة التجوبير هو كونو عروسنا الفذ طرد الطباخ اللي عيطلو لكونو استعمل في وصفة من الوصفات جراد البحر او مايعبر عنه بالرومية الكروفات لكونه يتغدى من نفايات البحر من شوائب ويمثل بذلك المقابل البحري للخنزير وبذلك فهو حرام محرم...فهل بعد هذه البهامة بهامة... سوى مارواه لي لحام كي جاه حريف وقالو روح شيت لسبب بسيط كونو حطلوا الميحاض موجه للقبلة في بيت الراحة ؟!

درجة الحرارة في تونس(العاصمة خاصة) مرتفعة بدرجة غير معقولة حيث يخيل لك لوهلة انك في ارض صحراوية قاحلة تسمع بالبحر سمعان.الحاجة اللي تخلي السخانة تزيد تستفعل في مؤخرة المواطنين البسطاء والزواليين كيما عبدكم المطيع اللي يتنقلوا في الكيران الصفراء ويقعدوا فالقهاوي الشعبية دون مكيفات هي التلوث وخاصة خاصة الغبرة..وماتبع ذلك من روايح عروقات ورقابي سواري كحل والتزام الانسان الصالح بالاغتسال على الاقل 5 مرات فاليوم وجحافل مالناموس عامل تايكواندو ويشارك في حملة التبرع بالدم.


جرايد الهانة ورقاد الجبانة :البارح جات على يدي جريدة اسمها '' كل الناس '' ..اتضح فيما بعد انها للمدعو ''الجريدي '' صاحب الشوليقة الحدث...هاوكا اللي عندو نزوات انتحارية ومالقاش الديكليك بش يعملها ينجم يتجه لاقرب كشك جرايد وبقدرة الواحد القهار قضيتو مقضية.


فانتظار الجديد..نخليكم مع منير الطرودي..حصرة على ايامك ياحمة مرهون فعيلة ومرا..اللي تجري في شهر تلما في جمعة تلڨاه وفا.غناية تلخص الوضع المالي المزري اللي نشوف فالعديد والعديد مالعايلات تقاسي فيه.
دمتم بخير..والفايدة فاللعب موش فالنتيجة

-

-